അഭിനയ മികവ് കൊണ്ട് മോളിവുഡിനപ്പുറവും ആരാധകരെയുണ്ടാക്കിയെടുത്ത താരമാണ് ദുൽഖർ സൽമാൻ. തമിഴിലും ഹിന്ദിയിലും തെലുങ്കിലുമെല്ലാം ദുൽഖർ സൽമാൻ തന്റെ മേൽവിലാസം ഇതിനോടകം ഉണ്ടാക്കിയെടുത്തു കഴിഞ്ഞു. 2012-ൽ പുറത്തിറങ്ങിയ ‘സെക്കന്റ് ഷോ’ എന്ന ചിത്രത്തിലൂടെയായിരുന്നു ദുൽഖറിന്റെ അരങ്ങേറ്റം. അഞ്ജലി മേനോന്റെ തിരക്കഥയിൽ അൻവർ റഷീദ് സംവിധാനം ചെയ്ത ‘ഉസ്താദ് ഹോട്ടൽ’ആയിരുന്നു രണ്ടാമത്തെ ചിത്രം. ചിത്രത്തിനു ലഭിച്ച ജനപ്രീതി ദുൽഖർ സൽമാൻ എന്ന നടന്റെയും ജനപ്രീതി വർദ്ധിപ്പിച്ചു. പിന്നീട് നിരവധി കഥാപാത്രങ്ങളിലൂടെ പ്രേക്ഷകരുടെ ഹൃദയം കവർന്ന ദുൽഖറിന് ‘ചാർലി’ എന്ന ചിത്രത്തിലെ അഭിനയത്തിന് മികച്ച നടനുള്ള കേരളസംസ്ഥാന ചലച്ചിത്ര അവാർഡ് ലഭിച്ചു. മമ്മൂട്ടിയുടെ മകൻ എന്ന മേൽവിലാസത്തിലേക്ക് ഒതുങ്ങാത്ത ദുൽഖർ സൽമാന്റെ 40-ാം പിറന്നാളാണ് ഇന്ന്. പ്രിയപ്പെട്ട കുഞ്ഞിക്കയ്ക് ആശംസകൾ നേരുകയാണ് ആരാധകരും സഹപ്രവർത്തകരും.
“ജന്മദിനാശംസകൾ ബം… ഹാപ്പി ഹാപ്പി 40.. നിങ്ങളെ ഞങ്ങളൊരുപാട് സ്നേഹിക്കുന്നു. ഏറ്റവും മികച്ച വർഷം ആശംസിക്കുന്നു. നീയും അമയും മുമുവും ഞങ്ങളുടേതാണ്,” നസ്രിയയുടെ ആശംസയിങ്ങനെ.
ദുൽഖറിന്റെ ജന്മദിനത്തിൽ പിതാവും മെഗാസ്റ്റാറുമായ മമ്മൂട്ടി ഫേസ്ബുക്കിൽ പങ്കുവച്ച പോസ്റ്റാണ് ആരാധകരിൽ ചിരി ഉണർത്തുന്നത്. മകന്റെ ജന്മദിന സന്ദേശം പ്രതീക്ഷിച്ച ആരാധകർക്ക് മുന്നിൽ മമ്മൂട്ടിയെത്തിയിരിക്കുന്നത് ലോക പ്രകൃതി സംരക്ഷണ ദിന പോസ്റ്റുമായിട്ടാണ്. ഒപ്പം വള്ളിച്ചെടി പടർത്തിയിരിക്കുന്ന മതിലിനരികെ നിൽക്കുന്ന ഒരു സ്റ്റൈലൻ ചിത്രമാണ് താരം പങ്കുവച്ചിരിക്കുന്നത്. എന്തായാലും താരത്തിന്റെ ചിത്രം ആരാധകർ ഏറ്റെടുത്തു കഴിഞ്ഞു. ചിലർ ദുൽഖറിനുള്ള ജന്മദിനാശംസയും പോസ്റ്റിനുള്ള കമന്റായി രേഖപ്പെടുത്തുകയാണ്.
കിംഗ് ഓഫ് കൊത്തയാണ് റിലീസിനൊരുങ്ങുന്ന ഏറ്റവും പുതിയ ദുൽഖർ ചിത്രം. ദുൽഖറിന്റെ കരിയറിലെ ഏറ്റവും വലിയ മലയാള ചിത്രമാണിത്. അഭിലാഷ് ജോഷി സംവിധാനം ചെയ്യുന്ന ചിത്രം സീ സ്റ്റുഡിയോസും ദുൽഖർ സൽമാന്റെ വേഫേറെർ ഫിലിംസും ചേർന്നാണ് നിർമ്മിക്കുന്നത്.
