ദില്ലി: മണിപ്പുരിലെ ചുര്‍ചന്‍പുരില്‍ നടന്ന ഭീകരാക്രമണത്തില്‍ കേണലും കുടുംബവും ഉള്‍പ്പെടെ ഏഴ് പേര്‍ കൊല്ലപ്പെട്ട ഭീകരാക്രമണത്തില്‍ വീരമൃത്യു വരിച്ചവര്‍ക്ക് അനുശോചനം രേഖപ്പെടുത്തി പ്രധാനമന്ത്രി നരേന്ദ്ര മോദി. ആക്രമണത്തിൽ വീരമൃത്യു വരിച്ച സൈനികർക്കും കുടുംബത്തിനും ആദരാഞ്ജലികൾ അർപ്പിക്കുന്നുവെന്നും അവരുടെ ത്യാഗത്തെ ഒരിക്കലും വിസ്മരിക്കാൻ സാധിക്കുകയില്ലെന്നും പ്രധാനമന്ത്രി പ്രതികരിച്ചു.
ദുഃഖത്തിന്റെ ഈ വേളയില്‍ മരിച്ചവരുടെ കുടുംബത്തോടൊപ്പം അവരുടെ സങ്കടത്തില്‍ പങ്കുചേരുന്നുവെന്നും പ്രധാനമന്ത്രി ട്വീറ്റ് ചെയ്തു. പ്രതിരോധ മന്ത്രി രാജ്‌നാഥ് സിങ്ങും ഭീകരാക്രമണത്തെ അപലപിച്ചു. വീരമൃത്യു വരിച്ച സൈനികര്‍ക്കും കേണല്‍ വിപ്ലവ് ത്രിപാഠിയുടെ ഭാര്യക്കും മകനും ആദരാഞ്ജലികള്‍ രേഖപ്പെടുത്തുന്നുവെന്ന് അദ്ദേഹം ട്വീറ്റ് ചെയ്തു. കുറ്റക്കാരെ എത്രയും വേഗം നിയമത്തിന് മുന്നില്‍ കൊണ്ടുവരുമെന്നും അദ്ദേഹം ട്വീറ്റ് ചെയ്തു. ഇന്ന് രാവിലെ പത്ത് മണിയോടെയായിരുന്നു അസം റൈഫിൾസിന്റെ വാഹന വ്യൂഹത്തിന് നേരെ കുഴിബോംബ് ആക്രമണം നടന്നത്.
