മോശം പരാമര്ശവുമായി തനിക്കെതിരെ രംഗത്തെത്തിയ എല്ഡിഎഫ് കണ്വീനര് എ.വിജയരാഘവനെതിരെ കോടതിയെ സമീപിച്ച് ആലത്തൂർ യു.ഡി.എഫ് സ്ഥാനാര്ത്ഥി രമ്യ ഹരിദാസ്. പോലീസില് സമീപിച്ചിട്ടും തനിക്ക് നീതി കിട്ടിയില്ലെന്നും വിജയ രാഘവനെതിരെ നടപടി ഉണ്ടായില്ലെന്നും ചൂണ്ടിക്കാട്ടിയാണ് രമ്യ കോടതിയെ സമീപിച്ചത്.
പി കെ കുഞ്ഞാലിക്കുട്ടിയേയും രമ്യ ഹരിദാസിനെയും ചേര്ത്തായിരുന്നു എല്ഡിഎഫ് കണ്വീനര് എ വിജയരാഘവൻ ദ്വയാര്ത്ഥ പരാമര്ശം നടത്തിയത്. പൊന്നാനിയില് ഈ മാസം ഒന്നാം തീയതി നടത്തിയ പ്രസംഗത്തിനെതിരെ രമ്യ ഹരിദാസ് പൊലീസില് പരാതി നല്കിയിരുന്നു. തിരൂര് ഡിവൈഎസ്പിയാണ് പ്രാഥമിക അന്വേഷണം നടത്തിയത്. കൃത്യമായ സൂചനകളൊന്നുമില്ലാതെ തയ്യാറാക്കിയ അന്വേഷണ റിപ്പോര്ട്ട് മലപ്പുറം ജില്ലാ പൊലീസ് മേധാവിക്ക് കൈമാറുകയും ചെയ്തിരുന്നു.
