ദില്ലി: രാജ്യത്തെ ദ്വിദിന ദേശീയ പണിമുടക്കിന്റെ (Strike disrupts public life) ആദ്യദിനം ജനങ്ങൾ ദുരിതത്തിൽ. കേരളമൊഴികെയുള്ള സംസ്ഥാനങ്ങളിൽ ജനജീവിതം സാധാരണ നിലയിൽ. എന്നാൽ സംസ്ഥാനത്തെ സ്വകാര്യ വാഹങ്ങൾ ഉൾപ്പെടെ തടയുകയാണ്. ജോലിക്കെത്തുന്നവരെ സമരക്കാർ മടക്കി അയക്കുകയാണ്. അങ്ങിങ്ങായി അനിഷ്ട സംഭവങ്ങളും അരങ്ങേറുന്നുണ്ട്.
മുംബൈ, ഡൽഹി, ബംഗളൂരു തുടങ്ങിയ നഗരങ്ങളിൽ സർക്കാർ ഓഫീസുകൾ ഉൾപ്പെടെ പ്രവർത്തിക്കുന്നുണ്ട്. മുംബൈയിൽ പൊതുഗതാഗതം ഉൾപ്പെടെ സാധാരണ ഗതിയിലാണ്. മറ്റ് സംസ്ഥാനങ്ങളിലും പൊതുഗതാഗതം തടസ്സപ്പെട്ടിട്ടില്ല. അഖിലേന്ത്യ ബാങ്ക് എംപ്ലോയീസ് അസോസിയേഷൻ പണിമുടക്കിന് പിന്തുണ പ്രഖ്യാപിക്കുമെന്ന് അറിയിച്ചിരുന്നു. എന്നാൽ ഇത് ബാങ്കിംഗ് മേഖലയെ കാര്യമായി ബാധിച്ചിട്ടില്ലെന്നാണ് വ്യക്തമാകുന്നത്.
സംസ്ഥാനങ്ങളിൽ വ്യാപാര സ്ഥാപനങ്ങളും സർക്കാർ ഓഫീസുകളും തുറന്നു പ്രവർത്തിക്കുന്നുണ്ട്. രണ്ട് ദിവസവും സർക്കാർ ജീവനക്കാർ ഹാജരാകണമെന്ന് സർക്കാർ നിർദ്ദേശം നൽകിയിരുന്നു. കടകളും മറ്റും തുറന്ന് പ്രവർത്തിക്കുന്നുണ്ട്. കർണാടകയിൽ ഇന്ന് മുതലാണ് എസ്എസ്എൽസി പരീക്ഷകൾ ആരംഭിക്കുന്നത്. പണി മുടക്ക് പരീക്ഷകളെ ബാധിക്കില്ലെന്ന് കർണാടക സർക്കാർ നേരത്തെ അറിയിച്ചിരുന്നു. മറ്റ് സംസ്ഥാനങ്ങളിലും പരീക്ഷകൾ സുഗമമായി നടക്കുന്നുണ്ട്.
എന്നാൽ കേരളത്തിൽ സ്ഥിതിഗതികൾ വ്യത്യസ്തമാണ്. രാവിലെ മുതൽ നിരത്തുകൾ ഒഴിഞ്ഞു കിടക്കുകയാണ്. പൊതുഗതാഗതം ഇല്ലാത്തതിനാൽ പോലീസ് വാഹനത്തിലാണ് ആളുകളെ ലക്ഷ്യസ്ഥാനത്തേക്ക് എത്തിക്കുന്നത്. സ്വകാര്യ വാഹനങ്ങൾ ഉൾപ്പെടെ തടയുന്നുണ്ട്. രാവിലെ മുതൽ കടകൾ അടഞ്ഞു കിടക്കുകയാണ്.
