മുംബൈ : ഇന്ത്യൻ സീനിയർ ടീം ജേഴ്സിയിൽ അരങ്ങേറാൻ ദീർഘകാലം കാത്തിരിക്കേണ്ടി വന്നിട്ടും, കിട്ടിയ അവസരം മുതലെടുത്ത് ആരാധകരെ ത്രസിപ്പിക്കുന്ന പ്രകടങ്ങളുമായി ട്വന്റി20യിൽ ലോകത്തിലെ തന്നെ ഒന്നാം നമ്പർ ബാറ്ററായി വളർന്ന സൂര്യകുമാർ യാദവാണ് തന്റെ മാതൃകയെന്ന് യുവതാരം സർഫറാസ് ഖാൻ വ്യക്തമാക്കി. ആഭ്യന്തര ക്രിക്കറ്റിൽ മിന്നും പ്രകടനങ്ങൾ ആവർത്തിച്ച് പുറത്തെടുത്തിട്ടും ഇന്ത്യൻ ടീമിൽനിന്ന് തുടർച്ചയായി തഴയപ്പെടുന്നതുമായി ബന്ധപ്പെട്ട വിവാദങ്ങളിലാണ് സർഫറാസ് ഖാന്റെ പ്രതികരണം.
രഞ്ജി ട്രോഫിയിൽ കുറച്ചുകാലമായി സ്ഥിരതയോടെ മിന്നുന്ന ഫോമിൽ കളിക്കുന്ന താരമാണ് സർഫറാസ് ഖാൻ. ഉടനടി താരം ഇന്ത്യൻ ജേഴ്സിയിൽ കളിക്കുമെന്നു വിലയിരുത്തലുകൾ ഉണ്ടായിരുന്നു. എന്നാൽ ഇത്തവണ ഓസ്ട്രേലിയയ്ക്കെതിരായ ടെസ്റ്റ് പരമ്പരയിലും താരത്തെ പരിഗണിച്ചില്ല. ഇത് വിവാദമായ സാഹചര്യത്തിലാണ് സൂര്യകുമാർ യാദവാണ് തന്റെ മാതൃകയെന്ന സർഫറാസിന്റെ തുറന്നുപറച്ചിൽ.