മുടി കൊഴിച്ചില്‍ നമ്മളിൽ ഭൂരിഭാഗം പേരും നേരിടുന്ന പ്രധാന പ്രശ്‌നങ്ങളിൽ ഒന്നാണ്.സാധാരണ ഗതിയില്‍ ദിവസവും എല്ലാവരുടേയും മുപ്പതോളം മുടി കൊഴിയാറുണ്ട്. എന്നാല്‍ ചിലര്‍ക്ക് ഏറെ മുടി കൊഴിയും.
ഇതിന് കാരണങ്ങള്‍ പലതുമുണ്ടാകും. പോഷകാഹാരക്കുറവ് മുതല്‍ അന്തരീക്ഷ മലിനീകണം വരെ ഇതിന് കാരണമാകുന്നു.ഇങ്ങനെയുള്ളവർ തീർച്ചയായും ശ്രദ്ധിക്കേണ്ട കുറച്ച് കാര്യങ്ങളുണ്ട്.എന്തൊക്കെയാണെന്ന് നോക്കാം …
ഷവറില്‍ നിന്നും
ഷവറില്‍ നിന്നും നേരിട്ട് വെളളം ചീറ്റിയൊഴിച്ച് കുളിയ്ക്കുന്നവര്‍ ധാരാളമുണ്ട്. ഷവറിന്റെ നേരെ താഴെ നിന്ന് നല്ല ശക്തിയില്‍ വരുന്ന വെള്ളത്തിന്റെ കീഴേ നിന്ന് കുളിയ്ക്കുന്നതാണ് പലരുടേയും ശീലം.
ഇത് മുടി കൊഴിച്ചില്‍ ഉള്ളവര്‍ക്ക് മുടി കൂടുതല്‍ കൊഴിയാന്‍ ഇടയാക്കുന്ന ഒന്നാണ്. ഇത്തരത്തില്‍ ശക്തിയില്‍ വെള്ളം വീഴുന്നത് മുടിയുടെ വേരുകളെ കേടു വരുത്തുന്നു. ഇതാണ് മുടി കൊഴിച്ചിലിന് ഇടയാക്കുന്നത്.
മുടി തോര്‍ത്തുമ്പോള്‍
കുളി കഴിഞ്ഞ് ശക്തിയായി മുടി തോര്‍ത്തുന്നവരുണ്ട്. ഇത് മുടി പോകാനുള്ള മറ്റൊരു കാരണമാണ്. കുളി കഴിഞ്ഞാല്‍ മുടി കൂടുതല്‍ ദുര്‍ബലമായിരിയ്ക്കും. ശക്തിയായി മുടി തോര്‍ത്തുമ്പോള്‍ മുടി കൊഴിയാന്‍ ഇത് ഇടയാക്കും. മാത്രമല്ല, ഇത് മുടിയുടെ ആരോഗ്യത്തിനും നല്ലതല്ല. മുടി വേരുകളെ ഇത് ദുര്‍ബലമാക്കും.
പതിയെ അധികം പരുപരുപ്പില്ലാത്ത തോര്‍ത്തു കൊണ്ട് മൃദുവായി തോര്‍ത്തി വെള്ളം കളയുന്നതാണ് നല്ലത്. ഇതു പോലെ ടവല്‍ കുളി കഴിഞ്ഞ് തലയില്‍ വച്ച് കെട്ടുന്നതും നല്ലതല്ല. ഇത് മുടി വേരുകളെ ദുര്‍ബലപ്പെടുത്തി മുടി കൊഴിച്ചിലിന് ആക്കം കൂട്ടും. ടവല്‍ വലിച്ച് കെട്ടുമ്പോള്‍ മുടിയുടെ വേരുകള്‍ വല്ലാതെ വലിയുന്നതാണ് പ്രശ്‌നമാകുന്നത്. ഇതു പോലെ തന്നെ ടവല്‍ മുടിയുടെ സ്വാഭാവിക എണ്ണമയം വലിച്ചെടുത്ത് മുടിയുടെ ആരോഗ്യത്തെ കേടു വരുത്തുകയും ചെയ്യുന്നു.
മുടി കെട്ടുമ്പോള്‍
മുടി വലിച്ചു പിടിച്ച് കെട്ടുന്നവരുണ്ട്. വലിച്ച് മുറുക്കി മുടി മെടഞ്ഞിടുന്നവര്‍, മുടി വലിച്ച് പോണി ടെയ്ല്‍ കെട്ടുന്നവര്‍ എല്ലാമുണ്ട്.ഇത് മുടിയുടെ വേരുകളെ ദുര്‍ബലപ്പെടുത്തും. പ്രത്യേകിച്ചും മുടിയുടെ വേരുകള്‍ ദുര്‍ബലമായി മുടി കൊഴിച്ചില്‍ കൂടുതലുള്ളവര്‍. മുടി കെട്ടുമ്പോള്‍ മുടി വേരുകളില്‍ സമ്മര്‍ദമേല്‍ക്കുന്നില്ലെന്ന് ഉറപ്പു വരുത്തണം.അയഞ്ഞ രീതിയില്‍ കെട്ടുക.
ഈറന്‍ മുടി ചീകുമ്പോള്‍
കുളി കഴിഞ്ഞ ഉടന്‍ മുടി ചീകരുത്. ദുര്‍ബലമായിരിയ്ക്കുന്ന മുടി കൊഴിയാന്‍ ഇത് ഇടയാക്കുന്നു. മാത്രമല്ല, ഈറന്‍ മുടി ചീകുമ്പോള്‍ സാധാരണ ഗതിയില്‍ തന്നെ മുടി പൊട്ടാനും ജട പിടിയ്ക്കാനും സാധ്യത ഏറെയാണ്.ഇതു പോലെ മുടി കൊഴിയുന്ന പ്രകൃതമുള്ളവര്‍ ഹെല്‍മെറ്റ് പോലുള്ളവ വയ്ക്കുമ്പോള്‍ ഷവര്‍ ക്യാപ്പോ ടവലോ തലയില്‍ കെട്ടി വച്ച ശേഷം ഹെല്‍മെറ്റ് വയ്ക്കുക. ഇല്ലെങ്കില്‍ ലൂസായ മുടിയിഴകള്‍ ഇതില്‍ കുടുങ്ങി പെട്ടെന്ന് തന്നെ പൊട്ടിപ്പോകും.
