മാലിന്യ കൂമ്പാരത്തില് ദേശീയപതാക ഉപേക്ഷിച്ച നിലയില് കണ്ടെത്തിയ സംഭവത്തില് മൂന്ന് പേര് അറസ്റ്റില്. കിഴക്കമ്പലം സ്വദേശി ഷമീര്, തോപ്പുംപടി സ്വദേശി സജാര്, ഇടുക്കി സ്വദേശി മണി ഭാസ്കര് എന്നിവരാണ് പിടിയിലായത്. കോസ്റ്റ് ഗാര്ഡില് നിന്നു മാലിന്യം ശേഖരിച്ച പ്രതികള് ഇത് യാര്ഡില് സൂക്ഷിക്കുകയും ഇവിടെ നിന്ന് ഇരുമ്പനം ഭാഗത്തെ മാലിന്യകൂമ്പാരത്തില് ഉപേക്ഷിക്കുകയായിരുന്നു. ഈ മാലിന്യക്കൂമ്പാരത്തിലാണ് തിങ്കളാഴ്ച ദേശീയപതാക കണ്ടെത്തിയത്.
തൃപ്പൂണിത്തുറയ്ക്ക് സമീപം ഇരുമ്പനത്താണ് സംഭവം. ദേശീയപതാക നാട്ടുകാരുടെ ശ്രദ്ധയില്പെട്ടതോടെ പൊലീസിനെ അറിയിക്കുകയായിരുന്നു. ഉടന് തന്നെ സ്ഥലത്തെത്തിയ പൊലീസ് ആദരവോടെ നടപടിക്രമങ്ങള് പാലിച്ച് പതാക മടക്കിയെടുത്തു മാറ്റി. ഇതിന് മുന്നോടിയായി ഒരു പൊലീസുകാരന് ദേശീയപതാകയെ സല്യൂട്ട് ചെയ്യുന്നതിന്റെ ദൃശ്യങ്ങള് സമൂഹമാധ്യമങ്ങളില് വൈറലായിരുന്നു. സംഭവത്തില് തൃപ്പുണിത്തുറ ഹില്പാലസ് പൊലീസാണ് കേസെടുത്ത് അന്വേഷണം നടത്തുന്നത്.