ടൊവിനൊ നായകനായ ചിത്രം ‘വാശി’ കഴിഞ്ഞ ദിവസമാണ് തിയറ്ററുകളിലെത്തിയത്. കീര്‍ത്തി സുരേഷാണ് ചിത്രത്തില്‍ നായികയായി അഭിനയിച്ചത്. മികച്ച പ്രതികരണമാണ് ചിത്രത്തിന് തിയറ്ററുകളില്‍ നിന്ന് ലഭിക്കുന്നത്. ഇപ്പോഴിതാ പ്രേക്ഷകര്‍ക്ക് നന്ദി പറഞ്ഞ് രംഗത്ത് എത്തിയിരിക്കുകയാണ് ടൊവിനൊ തോമസ്
സിനിമയ്ക്ക് മികച്ച പ്രതികരണം ലഭിക്കുന്നതില്‍ നന്ദി പറഞ്ഞുള്ള പോസ്റ്റര്‍ പങ്കുവെച്ചിരിക്കുകയാണ് ടൊവിനൊ തോമസ്. ഒരേ കേസില്‍ വാദിക്കും പ്രതിക്കും വേണ്ടി വാദിക്കേണ്ടിവരുന്ന രണ്ട് അഭിഭാഷകരുടെ വേഷത്തിലാണ് ടോവിനോയും കീര്‍ത്തിയും ചിത്രത്തില്‍ എത്തുന്നത്. ടൊവിനൊ തോമസിന്റെയും കീര്‍ത്തി സുരേഷിന്റെയും ഓണ്‍ സ്‍ക്രീൻ കെമിസ്‍ട്രി സിനിമയുടെ ആകര്‍ഷക ഘടകമായി മാറുന്നു. കോടതി രംഗങ്ങളില്‍ കീര്‍ത്തി സുരേഷും ടൊവിനോ തോമസും അതീവ മികവ് പുലര്‍ത്തിയിരിക്കുന്നുവെന്നാണ് തീയറ്റര്‍ പ്രതികരണങ്ങള്‍. കുടുംബസമേതം കാണേണ്ട ചിത്രമാണ് ഇതെന്നും പ്രതികരണങ്ങള്‍ വരുന്നു. കാലിക പ്രസ്‍ക്തിയുള്ള ഒരു വിഷയവും ‘വാശി’ ചര്‍ച്ച ചെയ്യുന്നുണ്ട്.
നവാഗതനായ വിഷ്‍ണു ജി രാഘവ് ആണ് ചിത്രം തിരക്കഥ എഴുതി സംവിധാനം ചെയ്‍തിരിക്കുന്നത്. വിനായക് ശശികുമാറാണ് ചിത്രത്തിന്റെ ഗാന രചന നിര്‍വഹിച്ചിരിക്കുന്നത്. കൈലാസ് മേനോന്‍ സംഗീത സംവിധാനം നിര്‍വഹിച്ചിരിക്കുന്നു. ചിത്രത്തിന്റെ റിലീസിന്റെ മുന്നേ തന്നെ ഗാനങ്ങള്‍ ഹിറ്റായി മാറിയിരുന്നു. രേവതി കലാമന്ദിറിന്റെ ബാനറില്‍ ജി സുരേഷ് കുമാറാണ് നിര്‍മ്മാണം. മേനക സുരേഷ്, രേവതി സുരേഷ് എന്നിവരാണ് കോ പ്രൊഡ്യൂസര്‍മാര്‍, എക്‌സിക്യൂട്ടീവ് പ്രൊഡ്യൂസര്‍ നിതിന്‍ മോഹന്‍. ലൈന്‍ പ്രൊഡ്യൂസര്‍ കെ രാധാകൃഷ്‍ണന്‍.
വിതരണം ഉര്‍വ്വശി തിയറ്റര്‍, ഛായാഗ്രാഹകന്‍ നീല്‍ ഡി കുഞ്ഞ. പശ്ചാത്തല സംഗീതം യാക്‌സന്‍ & നേഹ, എഡിറ്റര്‍ അര്‍ജുന്‍ ബെന്‍, ക്രീയറ്റിവ് സൂപ്പര്‍വൈസര്‍ മഹേഷ് നാരായണന്‍, മേക്കപ്പ്പി വി ശങ്കര്‍, വസ്‍ത്രാലങ്കാരം ദിവ്യ ജോര്‍ജ്. ചീഫ് അസോസിയേറ്റ് നിതിന്‍ മൈക്കിള്‍, ശബ്‍ദ മിശ്രണം എം ആര്‍ രാജാകൃഷ്‍ണന്‍. കലാ സംവിധാനം സാബു മോഹന്‍, പ്രൊഡക്ഷന്‍ കണ്‍ട്രോളര്‍ പ്രതാപന്‍ കള്ളിയൂര്‍, സ്റ്റില്‍സ് രോഹിത് കെ എസ്, പോസ്റ്റര്‍ ഡിസൈന്‍ ഓള്‍ഡ് മോങ്ക്സ്.
