ആർഷഭാരത പാരമ്പര്യത്തിന്റെയും സനാതന ധർമ്മമൂല്യങ്ങളുടെയും ഉൽപത്തിഭൂമിയായ ഭാരതത്തിന്റെ സാമ്പത്തിക തലസ്ഥാനമായ മുംബൈ, ആഗോള ഹൈന്ദവ സംഗമത്തിന് വേദിയാകാനൊരുങ്ങുന്നു. 2026 ഡിസംബർ 18 മുതൽ 20 വരെ ബാന്ദ്ര-കുർള കോംപ്ലക്സിലെ ജിയോ വേൾഡ് കൺവെൻഷൻ സെന്ററിൽ നടക്കുന്ന നാലാമത് ‘വേൾഡ് ഹിന്ദു കോൺഗ്രസ്’ ഉദ്‌ഘാടന സമ്മേളനത്തിൽ ആർ.എസ്.എസ്. സർസംഘചാലക് മാന്യനീയ ഡോ. മോഹൻ ഭാഗവത് മുഖ്യപ്രഭാഷണം നടത്തും. “സമാനം വ്രതം സഹ ചിത്തം” (ഏകീകൃത നിശ്ചയവും കൂട്ടായ പ്രതിജ്ഞാബദ്ധതയും) എന്ന മഹത്തായ ആപ്തവാക്യം മുൻനിർത്തി സംഘടിപ്പിക്കുന്ന ഈ അന്താരാഷ്ട്ര സമ്മേളനം ലോകമെമ്പാടുമുള്ള ഹൈന്ദവ സമൂഹത്തിന്റെ ഐക്യത്തിനും അഭിവൃദ്ധിക്കും പുതിയ ദിശാബോധം നൽകും.
ലോകത്തിലെ അറുപതിലധികം രാജ്യങ്ങളിൽ നിന്നായി നാലായിരത്തിലധികം പ്രമുഖ ഹൈന്ദവ നേതാക്കൾ, ചിന്തകർ, വ്യവസായ പ്രമുഖർ, മാധ്യമപ്രവർത്തകർ, സാംസ്കാരിക വക്താക്കൾ എന്നിവരാണ് ഈ ചരിത്ര സംഗമത്തിൽ പങ്കുചേരുന്നത്. സനാതന ധർമ്മത്തിന്റെ ആഗോള പ്രാധാന്യം, സാമൂഹിക ഐക്യദാർഢ്യം, ഉൽപ്പാദന-വ്യവസായ മേഖലകളിലെ നൈപുണ്യം, ഭാഷാ-സാംസ്കാരിക പൈതൃക സംരക്ഷണം എന്നിവ ആസ്പദമാക്കി നാല് സവിശേഷ പ്ലീനറി സെഷനുകളും 45-ലധികം ചർച്ചാ സമ്മേളനങ്ങളും പരിപാടിയിൽ ക്രമീകരിച്ചിട്ടുണ്ട്. അധിനിവേശ ചിന്തകളിൽ നിന്നും കൊളോണിയൽ മനോഭാവത്തിൽ നിന്നും മുക്തമായി, സനാതന സംസ്‌കാരത്തിന്റെ വീര്യം ലോകമെമ്പാടും പ്രചരിപ്പിക്കാനുള്ള മഹത്തായ കർമ്മപദ്ധതികൾക്ക് ഈ മഹാസമ്മേളനം രൂപം നൽകും.
ഭാരതത്തിന്റെ ആത്മീയ-സാംസ്കാരിക ഔന്നത്യം ലോകത്തിന് മുന്നിൽ വീണ്ടും ഉദ്ഘോഷിക്കുന്ന ഈ ചരിത്രമുഹൂർത്തത്തെ ഭാരതീയതയും ദേശീയതയും നെഞ്ചിലേറ്റുന്ന തത്വമയി ന്യൂസ് മലയാളത്തിൽ ഹൃദയം നിറഞ്ഞ ആശംസകളോടെ സ്വാഗതം ചെയ്യുന്നു. പ്രധാനമന്ത്രി നരേന്ദ്ര മോദിയുടെ ഭരണത്തിന് കീഴിൽ ഭാരതം വിശ്വഗുരു സ്ഥാനത്തേക്ക് കുതിച്ചുയരുമ്പോൾ, ലോകമെമ്പാടുമുള്ള ഹൈന്ദവ ശക്തികളെ ഏകോപിപ്പിക്കുന്ന ഇത്തരം സംരംഭങ്ങൾ ആർഷഭാരത സംസ്കൃതിക്ക് കൂടുതൽ കരുത്ത് പകരുന്നു.
