തിരുവനന്തപുരം: വെങ്ങാനൂർ പൗർണ്ണമിക്കാവ് ശ്രീ ബാല ത്രിപുര സുന്ദരീ ദേവി ക്ഷേത്രത്തിൽ ദേവീഹിത പ്രകാരം പ്രതിഷ്ഠിക്കാനുള്ള ലോകത്തിലെ ഏറ്റവും വലിയ ഹനുമാൻ വിഗ്രഹം ക്ഷേത്രത്തിൽ എത്തിച്ചു. പീഠവും കിരീടവും ഉൾപ്പെടെ 37 അടി പൊക്കമുള്ള വിഗ്രഹം തമിഴ്നാട്ടിലെ മൈലാടിയിയിൽ നിന്നാണ് ഘോഷയാത്രയായി കേരളത്തിലേക്ക് കൊണ്ടുവന്നത്. ഇന്ന് രാമായണ മാസാരംഭമായ ഇന്ന് കന്യാകുമാരി, ശുചീന്ദ്രം, ബാലരാമപുരം, പാളയം ഹനുമാൻ കോവിൽ എന്നിവിടങ്ങളിലെ വൻ സ്വീകരണങ്ങൾക്ക് ശേഷമാണ് വിഗ്രഹ ഘോഷയാത്ര വൈകുന്നേരത്തോടെ പൗർണ്ണമിക്കാവിൽ എത്തിയത്.
പൂർണ്ണമായും കൃഷ്ണശിലയിൽ അതിമനോഹരമായി കൊത്തിയെടുത്ത ഈ വിഗ്രഹത്തിന് ഏകദേശം 90 ടൺ ഭാരമുണ്ട്. ക്ഷേത്രത്തിൽ നിർമ്മിച്ചുവരുന്ന പ്രത്യേക ശ്രീകോവിലിന്റെ പണികൾ പൂർത്തിയായാലുടൻ വിഗ്രഹത്തിന്റെ ഔദ്യോഗിക പ്രതിഷ്ഠാ ചടങ്ങുകൾ നടക്കുമെന്ന് ഭാരവാഹികൾ അറിയിച്ചു. മുഖ്യപ്രതിഷ്ഠയായ ഹനുമാൻ സ്വാമിക്ക് പുറമെ, ഹനുമാന്റെ സഹോദരന്മാരായ ഗതിമാൻ, ശ്രുതിമാൻ, മതിമാൻ, കേതുമാൻ, ധൃതിമാൻ എന്നിവരുടെ വിഗ്രഹങ്ങളും വരും ദിവസങ്ങളിൽ പൗർണ്ണമിക്കാവിൽ പ്രതിഷ്ഠിക്കുമെന്നും ഇതിനായുള്ള ഒരുക്കങ്ങൾ പൂർത്തിയായി വരികയാണെന്നും ക്ഷേത്രം ഭാരവാഹികൾ വ്യക്തമാക്കി.
