ദില്ലി: രാജ്യത്ത് കോവിഡ് വ്യാപനം കുറയുന്നു. കഴിഞ്ഞ 24 മണിക്കൂറിനിടെ 1,150 കോവിഡ് കേസുകളാണ് രാജ്യത്ത് സ്ഥിരീകരിച്ചത്. മരണം 83. അതേസമയം, കോവിടിന്റെ ഏറ്റവും പുതിയ വകഭേദമായ എക്സ്ഇ ഗുജറാത്തിൽ സ്ഥിരീകരിച്ചു. ആദ്യമായാണ് എക്സ്ഇ വകഭേദം രാജ്യത്ത് റിപ്പോർട്ട് ചെയ്യപ്പെടുന്നത്. എന്നാൽ കേന്ദ്ര ആരോഗ്യമന്ത്രാലയം ഇക്കാര്യം ഇതുവരെ സ്ഥിരീകരിച്ചിട്ടില്ല.
അതേസമയം കഴിഞ്ഞ 24 മണിക്കൂറിനിടെ 1,194 പേർ കൂടി രോഗമുക്തി നേടി. നിലവിൽ 11,365 പേരാണ് രാജ്യത്ത് കോവിഡ് ബാധിച്ച് ചികിത്സയിൽ കഴിയുന്നത്. രാജ്യത്ത് ഇതുവരെ 4.25 കോടി പേർ രോഗമുക്തി നേടിയതായും കേന്ദ്രസർക്കാർ അറിയിച്ചു.
കഴിഞ്ഞ 24 മണിക്കൂറിനിടെ 14.79 ലക്ഷം ഡോസ് വാക്സിൻ ജനങ്ങൾ സ്വീകരിച്ചിട്ടുണ്ട്. ഇതോടെ രാജ്യത്ത് ഇതുവരെ വിതരണം ചെയ്ത വാക്സിൻ ഡോസുകളുടെ എണ്ണം 185.55 കോടിയായി.