തിരുവമ്പാടി: കോവിഡ് രോഗികള് കുത്തനെ കുതിച്ചുയരവെ രോഗനിര്ണയത്തിന് സര്ക്കാര് സംവിധാനം പരിമിതം. വിവിധ പഞ്ചായത്തുകളില് ആന്റിജന്, ആര്.ടി.പി.സി.ആര് പരിശോധനക്ക് ആഴ്ചയില് ഒരു ദിവസമാണ് സര്ക്കാര് സംവിധാനങ്ങള്ക്ക് കീഴില് സൗകര്യമൊരുക്കിയിരിക്കുന്നത്. രണ്ടു മാസം മുമ്പ് വരെ പരിശോധനക്ക് കൂടുതല് സൗകര്യമുണ്ടായിരുന്നു.
ഇപ്പോഴത്തെ സാഹചര്യത്തില് രോഗനിര്ണയം സാധ്യമാകാതെ ആളുകള് ദുരിതമനുഭവിക്കുകയാണ്. ഈ അവസരം സ്വകാര്യ ലാബുകള്ക്ക് കൊയ്ത്തായി മാറുന്നു. 500 രൂപയാണ് സ്വകാര്യ ലാബുകള് ആര്.ടി.പി.സി.ആര് പരിശോധനക്ക് ഈടാക്കുന്നത്. സാധാരണക്കാരായ രോഗികള് പണമില്ലാത്തതിനാല് രോഗനിര്ണയം സാധ്യമാകാതെ വൈറസ് വാഹകരായി രോഗം പടര്ത്തുന്ന സാഹചര്യവുമുണ്ട്.
പരമാവധി കോവിഡ് പരിശോധന ഒഴിവാക്കി രോഗികളുടെ എണ്ണം കുറച്ച് കാണിക്കാനുള്ള സംസ്ഥാന ആരോഗ്യ വകുപ്പ് നിര്ദേശത്തിന്റെ ഭാഗമാണ് പരിശോധന സംവിധാനങ്ങള് വെട്ടിച്ചുരുക്കിയതെന്ന് ചൂണ്ടിക്കാണിക്കപ്പെടുന്നു. രോഗസ്ഥിരീകരണ നിരക്ക് 15 ശതമാനത്തിന് മുകളില് കുതിയ്ക്കുമ്പോഴും ആകെ പരിശോധന സാമ്പിളുകളുടെ എണ്ണം വര്ധിക്കാത്തത് സര്ക്കാര് തന്ത്രമാണെന്നാണ് ആക്ഷേപം.
