ചെന്നൈ: ഓസ്‌ട്രേലിയൻ പരമ്പരയ്ക്ക് ശേഷം ജന്മനാട്ടിലേക്ക് മടങ്ങിയ തെക്കേ ഇന്ത്യയുടെ അഭിമാന താരം നടരാജൻ പളനി മുരുക ക്ഷേത്രത്തിൽ പോയി തല മൊട്ടയടിച്ചു. പളനി മുരുക ക്ഷേത്രത്തിൽ പോയി തല മൊട്ടയടിച്ച് തന്റെ നേർച്ച പൂർത്തിയാക്കിയ നടരാജന്റെ ചിത്രങ്ങളാണ് ഇപ്പോൾ സാമൂഹ്യ മാദ്ധ്യമങ്ങളിൽ വൈറലാകുന്നത്. നേർച്ചയ്ക്ക് ശേഷം ക്ഷേത്രത്തിൽ പ്രാർത്ഥന നടത്തിയതിന് ശേഷമാണ് നടരാജൻ മടങ്ങിയത്.
ഒരേ പരമ്പരയിൽ തന്നെ ക്രിക്കറ്റിന്റെ മൂന്ന് ഫോർമാറ്റിലും അരങ്ങേറ്റം കുറിച്ച ഏക ഇന്ത്യൻ താരമാണ് നടരാജൻ. ഡിസംബർ രണ്ടിന് കാൻബെറയിലായിരുന്നു നടരാജന്റെ ഏകദിന അരങ്ങേറ്റം. അരങ്ങേറ്റ ടൂർണമെന്റിൽത്തന്നെ മികച്ച പ്രകടനം നടത്തി ഇന്ത്യൻ ക്യാപ്റ്റൻ വിരാട് കോലിയുടെയും ടീം മാനേജ്മെന്റിന്റെയും ആരാധകരുടെയും ഇഷ്ടം പിടിച്ചുവാങ്ങിയ താരമാണ് നടരാജൻ.
സേലം ജില്ലയിലെ ചിന്നപ്പാംപട്ടിയെന്ന ചെറു ഗ്രാമത്തില്‍ നിന്നാണ് നടരാജന്‍ ഇപ്പോള്‍ ലോക ക്രിക്കറ്റിലെ തന്നെ ചര്‍ച്ചാ വിഷയമായി മാറിയിരിക്കുന്നത്. യോര്‍ക്കര്‍ സ്‌പെഷ്യലിസ്റ്റെന്നു വിശേഷിപ്പിക്കപ്പെടുന്ന താരത്തിന്റെ കരിയര്‍ മാറ്റി മറിച്ചത് കഴിഞ്ഞ സീസണിലെ ഐപിഎല്ലായിരുന്നു.
