രാവിലെ എഴുന്നേറ്റ് കുറച്ചുസമയം നടക്കുന്ന ശീലം നിങ്ങൾക്കുണ്ടോ?അതിനോളം ഗുണം വേറെ ഒന്നിനും ഇല്ലെന്ന് വ്യക്തമാക്കുകയാണ് ആരോഗ്യവിദഗ്ധർ.പ്രഭാതനടത്തം നല്ലതാണെന്ന് പറയുന്നതിന്റെ കാരണങ്ങൾ ഇവയാണ്
ശരീരഭാരം കുറയ്ക്കണം എന്ന് ആഗ്രഹിക്കുന്നവർക്ക് അനുയോജ്യമായ വ്യായാമമാണ് പ്രഭാത നടത്തം. ഉറക്കത്തിൽ നിന്നുണർന്ന് വിശ്രമം അവസാനിപ്പിച്ചുകൊണ്ട് രാവിലെ നടക്കാനിറങ്ങുമ്പോൾ അത് ചയാപചയ സംവിധാനത്തെയും ഉണർത്തും. കൂടുതൽ വേഹഹത്തിൽ കലോറി കത്തിക്കാൻ ഇതുവഴി ശരീരത്തിനാകും. മിതമായ വേഗത്തിൽ അര മണിക്കൂറെങ്കിലും നടന്നാൽ പോലും 150 കലോറി വരെ കത്തിച്ചുകളയാൻ കഴിയും.
രാവിലെ കട്ടിലിൽ നിന്ന് എഴുന്നേൽക്കുന്നതിന് മുമ്പുതന്നെ രക്തസമ്മർദ്ദവും ഹൃദയമിടിപ്പും ഉയരാനും എൻഡോക്രൈൻ ഗ്രന്ഥികൾ കൂടുതൽ ഹോർമോണുകൾ ഉത്പാദിപ്പിക്കാനും തുടങ്ങും. പ്രഭാത നടത്തം ഹൃദയമിടിപ്പും രക്തസമ്മർദവുമെല്ലാം നിയന്ത്രണത്തിൽ നിർത്താനും ഹൃദയാരോഗ്യം സംരക്ഷിക്കാനും സഹായിക്കും.
രോഗങ്ങളൊന്നും അലട്ടാതെ ആരോഗ്യത്തോടെ ജീവിക്കാനാണ് എല്ലാവരുടെയും ആഗ്രഹം. രാവിലെയുള്ള നടത്തം ശരീരത്തിൻറെ പ്രതിരോധശേഷി മെച്ചപ്പെടുത്തുകയും ഊർജവും കരുത്തും ഫ്ളെക്സിബിലിറ്റിയും വർദ്ധിപ്പിക്കാൻ സഹായിക്കുന്നതുമാണ്.
ദിവസവുമുള്ള നടത്തവും പോഷക സമ്പുഷ്ടമായ ഭക്ഷണവും എല്ലുകളെ ശക്തിപ്പെടുത്തും. 50 വയസ്സ് പിന്നിട്ടവർക്ക് എല്ലുകൾ നശിക്കുന്നതിൻറെ നിരക്ക് വർധിക്കുന്നതുമൂലം ഓസ്റ്റിയോപോറോസിസ് പോലുള്ള രോഗങ്ങളുണ്ടാകും. ഇത്തരം അവസ്ഥകൾ വൈകിപ്പിക്കാനും ദീർഘകാലം ആരുടെയും സഹായമില്ലാതെ നടക്കാനുമൊക്കെ ആഗ്രഹിക്കുന്നവർ ഇനി ദിവസവും രാവിലെ എഴുന്നേറ്റ് നടക്കാൻ തുടങ്ങണം.
