പാലോട്: വ്യാജരേഖയുണ്ടാക്കി ഒളിവില്‍ കഴിഞ്ഞ കള്ളനോട്ട് കേസിലെ പ്രതിയും യുവതിയും അറസ്റ്റില്‍. തെന്നൂരില്‍ രണ്ട് വര്‍ഷമായി വാടകക്ക് താമസിക്കുന്ന കോഴിക്കോട് വടകര വൈക്കിലശേരി പുത്തന്‍പുരയില്‍ വീട്ടില്‍ മുഹമ്മദ് ഹംജാദ് (26), കണ്ണൂര്‍ തയ്യില്‍ സജിനാ മന്‍സിലില്‍ സജിന (30) എന്നിവരാണ് അറസ്റ്റിലായത്. ഹംജദിന്റെ തിരിച്ചറിയല്‍ കാര്‍ഡുകള്‍ വീട്ടുടമസ്ഥന് നല്‍കാതെ ഒപ്പമുള്ള യുവതിയുടെയും അമ്മയുടെയും തിരിച്ചറിയല്‍ രേഖകള്‍ നല്‍കിയാണ് വാടകച്ചീട്ട് എഴുതിയിരുന്നത്. ആധാര്‍ കാര്‍ഡിലെ വിവരങ്ങളില്‍ തിരുത്തല്‍ വരുത്തിയതിനെത്തുടര്‍ന്ന് അറസ്റ്റിലായ ഇരുവരെയും റിമാന്‍ഡ് ചെയ്തു. പല സ്ഥലങ്ങളിലും വ്യാജരേഖ ചമച്ചാണ് താമസിച്ചത്.
2018ല്‍ കള്ളനോട്ട് കേസില്‍ പ്രതിയായി ജയില്‍ശിക്ഷ അനുഭവിച്ച ഹംജാദ് ജാമ്യത്തിലിറങ്ങിയ ശേഷം ബീമാപള്ളിയിലും പിന്നീട് തെന്നൂരും താമസമാക്കി. മൊബൈല്‍ ഫോണ്‍ റിപ്പയറിങ്ങില്‍ വിദഗ്ധനായ ഇയാള്‍ മൊബൈല്‍കട നടത്തിവരുകയായിരുന്നു. ഇയാളുടെ ദുരൂഹപശ്ചാത്തലത്തെപ്പറ്റി വിവരം ലഭിച്ച പാലോട് പൊലീസ് രഹസ്യമായി നിരീക്ഷിച്ചു. കടയില്‍ നടത്തിയ റെയ്ഡില്‍ പിടിച്ചെടുത്ത ലാപ്ടോപ്, മൊബൈല്‍, പ്രിന്‍റര്‍ എന്നിവ ശാസ്ത്രീയ പരിശോധനക്ക് അയച്ചു.
നെടുമങ്ങാട് എ.എസ്.പി രാജ്പ്രസാദിെന്‍റ നിര്‍ദേശപ്രകാരം പാലോട് ഇന്‍സ്പെക്ടര്‍ സി.കെ. മനോജ്, എസ്.ഐമാരായ നിസാറുദീന്‍, ബാബുകാണി, ജി.എസ്.ഐമാരായ റഹിം, ഉദയന്‍, വിനോദ്, അനില്‍കുമാര്‍, സജീവ്, സുരേഷ്ബാബു, റിയാസ്, ഗീത, സുജുകുമാര്‍, വിനീത്, സഹീഹത്ത് എന്നിവരടങ്ങിയ സംഘമാണ് കേസ് അന്വേഷിക്കുന്നത്.
