വയനാട്: പോലീസിനെ വെല്ലുവിളിച്ച് മുങ്ങിയ ഗുണ്ടാ നേതാവ് പല്ലൻ ഷൈജു (Pallan Shaiju Arrested) പിടിയിൽ. വയനാട്ടിലെ റിസോർട്ടിൽ ഒളിവിൽ കഴിഞ്ഞിരുന്ന ഷൈജുവിനെ മലപ്പുറം കോട്ടക്കൽ പോലീസാണ് കസ്റ്റഡിയിലെടുത്തത്. ഈ പോലീസ് സ്റ്റേഷനിൽ ഇയാള്ക്കെതിരെയുള്ള കേസില് വാറന്റ് ഉണ്ടായിരുന്നു. ഇന്ന് പുലർച്ചെയാണ് ഷൈജു വയനാട്ടിലെ റിസോർട്ടിൽ നിന്നും പിടിയിലായത്.
മലപ്പുറം എസ്പിയ്ക്ക് ലഭിച്ച രഹസ്യവിവരത്തിന്റെ അടിസ്ഥാനത്തിൽ പോലീസ് ഇയാളെ പിടികൂടാൻ വലവിരിക്കുകയായിരുന്നു. തുടർന്ന് നടത്തിയ തന്ത്രപരമായ നീക്കത്തിലാണ് ഈ കൊടുംക്രിമിനൽ പിടിയിലായത്. എന്നാൽ കഴിഞ്ഞ ദിവസമാണ് പോലീസിനെ വെല്ലുവിളിച്ചും പരിഹസിച്ചും ഷൈജു സമൂഹമാധ്യമങ്ങളിൽ പോസ്റ്റ് പങ്കുവച്ചത്.
അതിർത്തിയിലും, കടലിലും താൻ ഉണ്ടെന്ന് പറഞ്ഞാണ് പോലീസിനെ ഇയാൾ വെല്ലുവിളിച്ചത്. തൃശ്ശൂരിൽ നിന്നും റൂറൽ പോലീസ് ഗുണ്ടാനിയമം കാപ്പ ചുമത്തി ഷൈജുവിനെ നാടുകടത്തിയിരുന്നു. പോലീസ് നാടുകടത്തിയതിന്റെ പ്രകോപനത്തിലാണ് ഇയാൾ പോലീസിനെ വെല്ലുവിളിച്ച് ഒരു വീഡിയോ സന്ദേശമിട്ടത്. അതേസമയം ഒരു വർഷത്തേയ്ക്ക് ആണ് തൃശ്ശൂർ ജില്ലയിൽ കാൽകുത്തുന്നതിൽ നിന്നും ഇയാളെ വിലക്കിയത്. ജില്ലയിൽ പ്രവേശിച്ചെന്ന് തെളിഞ്ഞാൽ, മൂന്ന് വർഷം വരെ വിചാരണ കൂടാതെ തടവിൽ പാർപ്പിക്കുമെന്നാണ് പോലീസ് അറിയിച്ചത്.
