ദില്ലി: കൊടുംശൈത്യത്തില്‍ തണുത്ത് മരിച്ച ഇന്ത്യന്‍ കുടുംബത്തെ തിരിച്ചറിഞ്ഞു. അമേരിക്കയിലേക്ക് കടക്കാന്‍ ശ്രമിക്കവേയാണ് കാനഡയില്‍ ഇന്ത്യൻ കുടുംബം മരിച്ചു വീണത്. ഗുജറാത്ത് ഗാന്ധിനഗറിലെ ദിന്‍ഗുച്ച ഗ്രാമത്തിലെ ജഗദീഷ് പട്ടേലും കുടുംബവും ആണ് കൊടുംതണുപ്പില്‍ മരവിച്ച്‌ മരിച്ചത്. ദിവസങ്ങള്‍ക്ക് മുന്‍പാണ് മഞ്ഞില്‍ തണുത്ത് മരിച്ച നാലുപേരെ മാനിട്ടോബ റോയല്‍ കനേഡിയന്‍ മൗണ്ടഡ് പോലീസ് കണ്ടെടുത്തത്.
മൈനസ് 35 ഡിഗ്രി താപനില റെക്കോര്‍ഡ് ചെയ്യപ്പെട്ട പ്രദേശത്താണ് മൃതദേഹങ്ങള്‍ കണ്ടെത്തിയത്. മൂന്ന് മൃതദേഹങ്ങള്‍ ആണ് ആദ്യം കണ്ടെത്തിയത്. പിന്നീട് നടത്തിയ തിരച്ചിലില്‍ ഒരു കൗമാരക്കാരന്റെ മൃതദേഹം കൂടി കണ്ടെത്തുകയായിരുന്നു.
