ന്യൂഡൽഹി: സിന്ധു നദീജല ഉടമ്പടി സംബന്ധിച്ച് ഹേഗിലെ കോർട്ട് ഓഫ് ആർബിട്രേഷൻ പുറപ്പെടുവിച്ച പുതിയ വിധി പൂർണ്ണമായി തള്ളി ഇന്ത്യ. ഈ കോടതി നിയമവിരുദ്ധമായി രൂപീകരിച്ചതാണെന്നും അതിനാൽ ഇതിന് യാതൊരുവിധ നിയമപരമായ നിലനിൽപ്പില്ലെന്നും ഇന്ത്യ വ്യക്തമായി പ്രസ്താവിച്ചു. കോടതിയുടെ ഒരു തീരുമാനങ്ങളോ ഉത്തരവുകളോ നടപടികളോ രാജ്യം അംഗീകരിക്കില്ലെന്നും വിദേശകാര്യ മന്ത്രാലയം അറിയിച്ചു. സിന്ധു നദീജല ഉടമ്പടി പ്രകാരമുള്ള പരമാവധി ജലലഭ്യതയുമായി ബന്ധപ്പെട്ട വിഷയത്തിൽ മേയ് 15-നാണ് കോർട്ട് ഓഫ് ആർബിട്രേഷൻ വിധി പുറപ്പെടുവിച്ചത്.
മുൻകാല വിധിന്യായങ്ങളെപ്പോലെ തന്നെ ഈ പുതിയ ഉത്തരവിനെയും ഇന്ത്യ പൂർണ്ണമായും തള്ളിക്കളയുകയാണെന്ന് വിദേശകാര്യ മന്ത്രാലയ വക്താവ് രൺധീർ ജയ്‌സ്വാൾ വാർത്താ സമ്മേളനത്തിൽ വ്യക്തമാക്കി. ഈ കോടതിയുടെ സ്ഥാപനത്തെ ഇന്ത്യ ഒരിക്കലും അംഗീകരിച്ചിട്ടില്ല. അതിനാൽ തന്നെ ഇതിന്റെ ഭാഗമായുള്ള നടപടികൾക്കോ തീരുമാനങ്ങൾക്കോ നിയമപരമായ യാതൊരു പ്രാധാന്യവുമില്ലെന്നും അവ പൂർണ്ണമായും അസാധുവാണെന്നും അദ്ദേഹം പറഞ്ഞു .സിന്ധു നദീജല കരാർ താൽക്കാലികമായി നിർത്തിവയ്ക്കാനുള്ള ഇന്ത്യയുടെ തീരുമാനം പ്രാബല്യത്തിൽ തുടരുമെന്ന് വിദേശകാര്യ മന്ത്രാലയം വീണ്ടും വ്യക്തമാക്കി. സിന്ധു നദീജല സംവിധാനത്തിന്റെ ഉപയോഗം നിയന്ത്രിക്കുന്നതിനായി 1960 സെപ്റ്റംബർ 19-നാണ് ഇന്ത്യയും പാകിസ്ഥാനും തമ്മിൽ ഈ ഉടമ്പടിയിൽ ഒപ്പുവെക്കുന്നത്. എന്നാൽ, കഴിഞ്ഞ വർഷം പഹൽഗാമിൽ നടന്ന ഭീകരാക്രമണത്തെത്തുടർന്ന് അന്താരാഷ്‌ട്ര നിയമപ്രകാരം ഇന്ത്യ അതിന്റെ പരമാധികാര അവകാശങ്ങൾ പ്രയോഗിക്കുകയും കരാർ താൽക്കാലികമായി നിർത്തിവയ്ക്കുകയുമായിരുന്നു.
അതിർത്തി കടന്നുള്ള ഭീകരതയ്ക്കുള്ള പിന്തുണ പാകിസ്ഥാൻ അവസാനിപ്പിക്കുന്നതുവരെ കരാർ നിർത്തിവയ്ക്കുമെന്ന നിലപാടിൽ ഇന്ത്യ ഉറച്ചുനിൽക്കുകയാണ്.
കരാർ താൽക്കാലികമായി നിർത്തിവച്ചിരിക്കുന്ന സാഹചര്യത്തിൽ, അതിലെ ഒരു ബാധ്യതയും നിറവേറ്റാൻ ഇന്ത്യ ബാധ്യസ്ഥരല്ലെന്ന് 2025 ജൂണിൽ തന്നെ വിദേശകാര്യ മന്ത്രാലയം വ്യക്തമാക്കിയതാണ്. രാജ്യത്തിന്റെ പരമാധികാര അവകാശങ്ങൾ മുൻനിർത്തി സ്വീകരിക്കുന്ന നടപടികളുടെ സാധുതയെ ചോദ്യം ചെയ്യാൻ ഒരു ആർബിട്രേഷൻ കോടതിക്കും അവകാശമില്ലെന്നും, പ്രത്യേകിച്ച് നിയമവിരുദ്ധമായി രൂപീകരിച്ച ഒരു കോടതിക്ക് അതിന് സാധിക്കില്ലെന്നും ഇന്ത്യ വ്യക്തമാക്കിയിട്ടുണ്ട്.
കഴിഞ്ഞ വർഷം ജമ്മു കശ്മീരിലെ കിഷൻഗംഗ, റാറ്റിൽ ജലവൈദ്യുത പദ്ധതികളുടെ അധികാരപരിധി സംബന്ധിച്ച് കോടതി ഒരു “സപ്ലിമെന്ററി അവാർഡ്” പുറപ്പെടുവിച്ചപ്പോഴും വിദേശകാര്യ മന്ത്രാലയം കടുത്ത വിമർശനം ഉന്നയിച്ചിരുന്നു. ഈ ആർബിട്രേഷൻ ബോഡിയുടെ രൂപീകരണം തന്നെ സിന്ധു ജല ഉടമ്പടിയുടെ ഗുരുതരമായ ലംഘനമാണ്. ഇതിന് കീഴിൽ എടുക്കുന്ന എല്ലാ തീരുമാനങ്ങളും നിയമവിരുദ്ധമാണെന്നാണ് ഇന്ത്യയുടെ നിലപാട്.പാകിസ്ഥാൻ അന്താരാഷ്‌ട്ര വേദികളെ ദുരുപയോഗം ചെയ്യുകയാണെന്നും ഇന്ത്യ ആരോപിച്ചു. ഇത്തരം ഒരു “വ്യാജ മധ്യസ്ഥ പ്രക്രിയ”യിലേക്ക് പാകിസ്ഥാൻ തിരിയുന്നത് അന്താരാഷ്‌ട്ര വേദികളെ വഞ്ചിക്കുന്നതിനും ദുരുപയോഗം ചെയ്യുന്നതിനുമുള്ള അവരുടെ ദീർഘകാല നയത്തിന്റെ ഭാഗമാണ്. ഇത്തരം നാടകങ്ങളിലൂടെ ആഗോള ഭീകരതയുടെ കേന്ദ്രമെന്ന സ്വന്തം ഉത്തരവാദിത്തത്തിൽ നിന്ന് ഒഴിഞ്ഞുമാറാനാണ് പാകിസ്ഥാൻ ശ്രമിക്കുന്നതെന്നും ഇന്ത്യ ശക്തമായ ഭാഷയിൽ കുറ്റപ്പെടുത്തി.
