തിരുവനന്തപുരം: ഇന്ത്യയുടെ മഹാഗായിക ലതാമങ്കേഷ്‌കറുടെ വിയോഗത്തിൽ ദു:ഖമറിയിച്ച് നടൻ മോഹൻലാൽ.
ഭാരത രത്‌ന ശ്രീമതി ലതാ മങ്കേഷ്‌കർ എന്ന സംഗീത പ്രതിഭയുടെ വിയോഗ വാർത്ത അറിഞ്ഞപ്പോൾ അഗാധമായ ദുഃഖം തോന്നിയെന്നും അവർ അവരുടെ സംഗീതത്തിലൂടെ ഇനി ജീവിക്കട്ടെയെന്നും അനുശോചനം രേഖപ്പെടുത്തുന്നുവെന്നും മോഹൻലാൽ സമൂഹമാധ്യമത്തിൽ കുറിച്ചു.
ഇന്ന് രാവിലെ 9.45ഓടെയാണ് ഗായിക ലതാ മങ്കേഷ്‌കർ അന്തരിച്ചത്. മുംബൈയിലെ സ്വകാര്യ ആശുപത്രിയിൽ കഴിഞ്ഞ ഒരുമാസമായി ചികിത്സയിൽ കഴിയുകയായിരുന്നു ലത മങ്കേഷ്‌കർ. കഴിഞ്ഞ ദിവസം ആരോഗ്യനില അതീവ ഗുരുതരമായതിനെ തുടർന്ന് വെന്റിലേറ്ററിൽ പ്രവേശിപ്പിച്ചിരുന്നു. കോവിഡ് ബാധിച്ചതിനെ തുടർന്ന് ജനുവരി എട്ടിനാണ് ഗായികയെ മുംബൈയിലെ ബ്രീച്ച് കാൻഡി ആശുപത്രിയിൽ പ്രവേശിപ്പിച്ചത്. അന്ന് മുതൽ ഹോസ്പിറ്റലിലെ തീവ്രപരിചരണ വിഭാഗത്തിൽ ചികിത്സയിലായിരുന്നു.
ലതാ മങ്കേഷ്‌കറിന്റെ അന്ത്യം സംഗീത ലോകത്തിന്റെ ഒരു യുഗാന്ത്യം കൂടിയാണെന്ന് മനസിലാക്കുന്നതുകൊണ്ടാണ് ആരാധകര്‍ക്ക് ഈ വിയോഗം ഉള്‍ക്കൊള്ളാന്‍ പ്രയാസമാകുന്നത്. ഇതിഹാസ ഗായികയ്ക്ക് ആദരാഞ്ജലികള്‍ അര്‍പ്പിച്ച് കലാ, സാസംകാരിക, രാഷ്ട്രീയ രംഗങ്ങളിലെ നിരവധി പ്രമുഖരാണ് രംഗത്തെത്തിയിരിക്കുന്നത്.
