മുംബൈ: മയക്കുമരുന്ന് കേസില് അറസ്റ്റിലായ ബോളിവുഡ് സൂപ്പര്സ്റ്റാര് ഷാരൂഖ് ഖാന്റെ മകന് ആര്യന് ഖാന് ഇന്നും ജാമ്യമില്ല. ആര്യന്റെ (aryan khan) അഭിഭാഷകന് സതീഷ് മനെഷിന്ഡെ സമര്പ്പിച്ച ഇടക്കാല ജാമ്യാപേക്ഷ മുംബൈ മജിസ്ട്രേറ്റ് കോടതി തള്ളി. ഇതോടൊപ്പം അര്ബാസ് മര്ച്ചന്റ്, മുണ്മണ് ധമേച്ച എന്നിവരുടെ ജാമ്യാപേക്ഷയും തള്ളിയിട്ടുണ്ട്. മൂവരും ജുഡീഷ്യല് കസ്റ്റഡിയില് തുടരും. ആര്യന് ഖാന് ജാമ്യം നല്കുന്നത് അന്വേഷണത്തെ ബാധിക്കുമെന്ന് എന്.സി.ബി സംഘം കോടതിയില് വാദിച്ചു.
അതേസമയം ആര്യന്റെ പക്കലില് നിന്നും ലഹരിവസ്തുക്കള് പിടിച്ചെടുത്തിട്ടില്ലെന്ന് പ്രതിഭാഗം അഭിഭാഷകനും കോടതിയില് അറിയിച്ചു. ചോദ്യം ചെയ്യലില് ആര്യന് എല്ലാ വിവരങ്ങളും നല്കിയിട്ടുണ്ടെന്നും അഭിഭാഷകന് പറഞ്ഞു. ആഡംബര കപ്പലില് പാര്ട്ടി നടത്തിയവര് ക്ഷണിച്ചതനുസരിച്ചാണ് ആര്യന് ഖാന് എത്തിയതെന്നും പ്രതിഭാഗം വ്യക്തമാക്കി.
കഴിഞ്ഞ ദിവസം ആര്യന് ഖാന് ഉള്പ്പടെ എട്ട് പ്രതികളെ 14 ദിവസത്തെ ജുഡീഷ്യല് കസ്റ്റഡിയില് വിട്ടിരുന്നു. കസ്റ്റഡി നീട്ടണമെന്ന എന്.സി.ബി ആവശ്യം തള്ളിയിരുന്നു. തുടര്ന്ന് ആര്യനെ ജുഡീഷ്യല് കസ്റ്റഡിയില് വിടുകയായിരുന്നു.