ന്യൂയോർക്ക്: ക്വാഡ് സമ്മേളനത്തിനായി യുഎസിലെത്തിയ പ്രധാനമന്ത്രി നരേന്ദ്ര മോദിയെ (PM Modi) ത്രിവർണ്ണ പതാക വീശി ജനങ്ങൾ സ്വീകരിച്ചത് സമൂഹ മാധ്യമങ്ങളിൽ ഏറെ തരംഗം സൃഷ്ടിച്ചിരുന്നു. ഇപ്പോഴിതാ ജോ ബൈഡനുമായുള്ള കൂടിക്കാഴ്ചയ്ക്ക് ശേഷം യുഎന്നിൽ അഭിസംബോധന ചെയ്യാനായി പ്രധാനമന്ത്രി ന്യൂയോർക്കിൽ എത്തിയിരിക്കുകയാണ്. വൻ സ്വീകരണമാണ് ഇവിടെയും പ്രധാനമന്ത്രിയെ കാത്തിരുന്നത്.
പ്രധാനമന്ത്രി നരേന്ദ്രമോദിയെ നേരിട്ട് കാണാൻ ന്യൂയോർക്കിലും പ്രവാസിസമൂഹം തടിച്ചുകൂടി . “വന്ദേമാതരവും, ഭാരത് മാതാ കീ ജയ്” വിളികളുമായും മോദിയുടെ പേര് ഉറക്കെ വിളിച്ചും ആവേശത്തിലായിരുന്നു പ്രവാസികൾ പ്രധാനമന്ത്രിയെ സ്വീകരിച്ചത്.
അദ്ദേഹം താമസിക്കുന്ന ഹോട്ടലിന് മുൻപിലായിരുന്നു പ്രവാസികൾ അദ്ദേഹത്തെ കാണാനെത്തിയത്. കഴിഞ്ഞ ദിവസം വാഷിംഗ്ടൺ ഡിസിയിൽ ലഭിച്ച സ്വീകരണത്തിന് സമാനമായി ഇന്ത്യൻ പതാകയും (Indian Flag) കൈയ്യിലേന്തിയാണ് സ്ത്രീകൾ അടക്കമുളള പ്രവാസികൾ നരേന്ദ്രമോദിയെ കാണാൻ എത്തിയത്. പുഞ്ചിരിയോടെ കൈ കൂപ്പി ഇവർക്ക് അരികിലേക്ക് എത്തിയ പ്രധാനമന്ത്രി കുശലാന്വേഷണവും നടത്തിയ ശേഷമാണ് ഹോട്ടലിലേക്ക് കയറിയത്. ഇന്ന് പുലർച്ചെയോടെയാണ് പ്രധാനമന്ത്രി ന്യൂയോർക്കിലെത്തിയത്. വാഷിംഗ്ടണിൽ യുഎസ് പ്രസിഡന്റ് ജോ ബൈഡനുമായും ക്വാഡ് രാഷ്‌ട്രതലവൻമാരുമായും കൂടിക്കാഴ്ച നടത്തിയിരുന്നു.
