ബാഗ്ദാദ്: ഭീകരസംഘടനയായ ഇസ്‌ലാമിക് സ്റ്റേറ്റ് നേതാവ് സുലൈമാന്‍ അഹമ്മദ് മുദീന്‍ കൊല്ലപ്പെട്ടു. ഇറാക്കിന്‍റെ പടിഞ്ഞാറന്‍ പ്രവിശ്യയായ അന്‍ബാറില്‍ ഇറാക്ക് സുരക്ഷാ സേന നടത്തിയ ആക്രമണത്തിലാണ് കൊല്ലപ്പെട്ടത്. പ്രവിശ്യയിലെ ഐഎസ് ക്യാമ്പുകളുടെ ചുമതല വഹിച്ചിരുന്നത് മുദീനാണെന്ന് പ്രവിശ്യ പോലീസ് മേധാവി പറഞ്ഞു.
അന്‍ബാര്‍ പ്രവിശ്യാ തലസ്ഥാനമായ റമാദിക്ക് സമീപമുള്ള മരുഭൂപ്രദേശത്ത് വച്ചാണ് ഐഎസ് നേതാവിനെ വധിച്ചത്. ഓപ്പറേഷന്‍‌സ് കമാന്‍ഡും പ്രോവിന്‍ഷ്യല്‍ പോലീസ് കമാന്‍ഡോസും സം‍യുക്തമായായിരുന്നു ആക്രമണം. പ്രവിശ്യയില്‍ നടന്ന നിരവധി ഭീകരാക്രമണങ്ങളുടെ സൂത്രധാരന്‍ ഇയാളായിരുന്നു. ഐഎസിന്‍റെ പതനത്തോടെ ഇറാക്കിലെ സുരക്ഷാ സാഹചര്യങ്ങള്‍ മെച്ചപ്പെട്ടിട്ടുണ്ട്. എങ്കിലും ഒറ്റപ്പെട്ട ആക്രമണങ്ങളും നീക്കങ്ങളും ഇപ്പോഴും ചെറുതല്ലാത്ത ഭീഷണി ഉയര്‍ത്തുന്നുണ്ട്.
