ശ്രീകണ്ഠപുരം: ഗൂഗിൾ പേ വഴി പണം വാങ്ങിയ ശേഷം വൻതോതിൽ മാരക ലഹരിമരുന്നായ എം.ഡി.എം.എ വിൽക്കുന്ന രണ്ടുപേർ പിടിയിൽ. ശ്രീകണ്ഠപുരം അടുക്കത്തെ വടക്കേപറമ്പിൽ സജു (44), ചെങ്ങളായി ചേരൻകുന്നിലെ പുതിയപുരയിൽ മുഹമ്മദ് ഷഹൽ (24) എന്നിവരാണ് പിടിയിലായത്. ശ്രീകണ്ഠപുരം എസ്.എച്ച്.ഒ രാജേഷ് മാരാംഗലത്തിന്റെ നേതൃത്വത്തിലാണ് പ്രതികളെ അറസ്റ്റ് ചെയ്തത്. പിടിയിലായ ഇരുവരും ഡ്രൈവർമാരാണ്.
ശനിയാഴ്ച രാത്രി ശ്രീകണ്ഠപുരം ഓടത്തുപാലത്തിനു സമീപം വെച്ചാണ് ഇവരെ പിടികൂടിയത്. ചെമ്പേരിയിൽ ലഹരിമരുന്ന് നൽകി തിരികെ വരുന്നതിനിടെയാണ് കാറുമായി പ്രതികൾ പിടിയിലായത്. 14.06 ഗ്രം എം.ഡി.എം.എ ഇവരിൽ നിന്ന് പിടിച്ചെടുത്തു. ഏറെക്കാലമായി ജില്ലയിലെ മലയോര മേഖലയിലടക്കം വ്യാപകമായി ലഹരിമരുന്ന് വിൽപ്പന നടത്തുന്ന സംഘത്തിലെ കണ്ണികളാണ് ഇവരെന്ന് പോലീസ് പറഞ്ഞു. ഗൂഗിൾ പേ വഴി പണം അക്കൗണ്ടിലേക്ക് അയപ്പിച്ച ശേഷം പറഞ്ഞ സ്ഥലത്ത് ലഹരിമരുന്ന് എത്തിക്കുന്ന രീതിയാണ് ഇവർ സ്വീകരിച്ചിരുന്നത്. രഹസ്യ വിവരത്തെ തുടർന്ന് ഏറെ നാളായി സംഘം പോലീസ് നിരീക്ഷണത്തിലായിരുന്നു.