കാസര്‍കോട്: കോവിഡ് മുന്‍കരുതലിന്റെ ഭാഗമായി മുംബൈയില്‍ നിന്നും എത്തിയ 32 പേരടങ്ങിയ കാസര്‍കോട്ടുകാരുടെ സംഘത്തെ പ്രത്യേകം തയ്യാറാക്കിയ ഐസൊലേഷന്‍ വാര്‍ഡിലേക്ക് മാറ്റി. മുംബൈയില്‍ ജോലി ചെയ്യുകയായിരുന്ന കാസര്‍കോട്ട് വലിയപറമ്പ് സ്വദേശികളെയാണ് താത്കാലികമായി സജ്ജമാക്കിയ ക്യാമ്പിലേക്ക് മാറ്റിയത്.
വലിയപറമ്പ് പടന്നക്കടപ്പുറം ഗവര്‍ണ്‍മെന്റ് ഫിഷറീസ് ഹയര്‍സെക്കന്‍ഡറി സ്‌കൂള്‍ പ്രത്യേക ഐസൊലേഷന്‍ വാര്‍ഡ് സജ്ജമാക്കിയാണ് ഇത്രയും പേരെ പാര്‍പ്പിച്ചിരിക്കുന്നത്. അടുത്ത 14 ദിവസം ഇവര്‍ ഈ ക്യാംപില്‍ തുടരും. നിലവില്‍ ഇവരിലാര്‍ക്കും രോഗലക്ഷണങ്ങളില്ല. 14 പേര്‍ക്ക് രോഗബാധ സ്ഥിരീകരിച്ചതോടെ കാസര്‍കോട്ട് ജില്ലയില്‍ അതീവ ജാഗ്രത തുടരുകയാണ്. അടുത്ത രണ്ടാഴ്ച ജില്ലയില്‍ കര്‍ശന നിയന്ത്രണങ്ങളാണ് നിലനില്‍ക്കുക.
