2026-ലെ തമിഴ്‌നാട് നിയമസഭാ തിരഞ്ഞെടുപ്പിനിടെ, വോട്ട് രേഖപ്പെടുത്താൻ ബൂത്തിലെത്തിയ തമിഴ് നടി അക്ഷയ ഹരിഹരന് ഉണ്ടായത് അവിശ്വസനീയമായ ദുരനുഭവം. തന്റെ വോട്ട് മറ്റൊരാൾ നേരത്തെ തന്നെ രേഖപ്പെടുത്തിയെന്ന് കണ്ടെത്തിയതോടെ നടി ഇതിനെതിരെ രൂക്ഷമായ പ്രതിഷേധവുമായി രംഗത്തെത്തി. ചെന്നൈയിലെ അഡയാറിലുള്ള പോളിംഗ് ബൂത്തിൽ വെച്ചാണ് സംഭവം നടന്നത്.
തന്റെ സോഷ്യൽ മീഡിയ അക്കൗണ്ടുകൾ വഴിയാണ് നടി ഈ സംഭവം ലോകത്തെ അറിയിച്ചത്. തിരഞ്ഞെടുപ്പ് ഉദ്യോഗസ്ഥരുടെ ഗുരുതരമായ വീഴ്ചയാണ് ഇതിന് പിന്നിലെന്നും അവർ ആരോപിച്ചു.
ചെന്നൈയിലെ വേളച്ചേരിയിൽ താമസിക്കുന്ന അക്ഷയ, വോട്ട് ചെയ്യുന്നതിനായി അഡയാറിലെ പോളിംഗ് ബൂത്തിൽ എത്തുകയായിരുന്നു. ഓൺലൈൻ വഴി ബൂത്ത് വിവരങ്ങൾ കൃത്യമായി പരിശോധിച്ച ശേഷമാണ് താരം എത്തിയത്. എന്നാൽ, ഒരു മണിക്കൂറോളം നീണ്ട കാത്തിരിപ്പിന് ശേഷം ഉദ്യോഗസ്ഥർ നൽകിയ മറുപടി അക്ഷയയെ ഞെട്ടിച്ചു. അക്ഷയയുടെ വോട്ട് നേരത്തെ തന്നെ മറ്റൊരാൾ രേഖപ്പെടുത്തിക്കഴിഞ്ഞു എന്ന് അധികൃതർ അറിയിച്ചു.
രേഖകളിലെ പേരും പിതാവിന്റെ പേരും കൃത്യമായിരുന്നെങ്കിലും, വോട്ടർ പട്ടികയിലെ ഫോട്ടോയും വിരലടയാളവും തന്റേതല്ലെന്ന് അക്ഷയ ചൂണ്ടിക്കാട്ടി. ഇത് വ്യക്തമായ കള്ളവോട്ടാണെന്നും വലിയൊരു അട്ടിമറിയാണ് നടന്നതെന്നും താരം ആരോപിച്ചു.
തുടർന്ന്, അധികൃതർ നടിക്ക് ‘ടെണ്ടർ വോട്ട്’ (Tender Vote) ചെയ്യാൻ അനുമതി നൽകി. എന്നാൽ, ഈ നടപടിക്രമങ്ങളിലും അക്ഷയ കടുത്ത അതൃപ്തി രേഖപ്പെടുത്തി.
“ഇതൊരു സുതാര്യമായ രീതിയല്ല. വോട്ട് രേഖപ്പെടുത്തിയത് വെറുമൊരു കടലാസിലാണ്, അതിൽ സീൽ പോലും പതിച്ചില്ല. ഇത് യഥാർത്ഥ വോട്ടിംഗിന് പകരമാകില്ല. എന്റെ ചോദ്യങ്ങൾക്ക് അവിടെയുണ്ടായിരുന്ന ആർക്കും ഉത്തരമില്ലായിരുന്നു. വോട്ടിംഗ് യന്ത്രത്തിൽ (EVM) വോട്ട് ചെയ്യാൻ സാധിക്കാത്തതിനാൽ ഞാൻ വോട്ട് ചെയ്തതായി എനിക്ക് തോന്നുന്നില്ല,” അക്ഷയ തന്റെ സോഷ്യൽ മീഡിയ പോസ്റ്റിൽ വ്യക്തമാക്കി.
തന്റെ വോട്ട് പാഴായിപ്പോകരുത് എന്ന് നിർബന്ധം ഉള്ളതുകൊണ്ടാണ് ടെണ്ടർ വോട്ട് ചെയ്തതെന്ന് അക്ഷയ പറഞ്ഞു. വോട്ടർമാർ തങ്ങളുടെ വോട്ടർ ഐഡിയും മറ്റ് രേഖകളും അതീവ ശ്രദ്ധയോടെ കൈകാര്യം ചെയ്യണമെന്നും, ഇത്തരം അനുഭവങ്ങൾ മറ്റാർക്കും ഉണ്ടാകരുതെന്നും അവർ അഭ്യർത്ഥിച്ചു. തിരഞ്ഞെടുപ്പ് കമ്മീഷൻ ഇത്തരം വീഴ്ചകളിൽ കർശന നടപടി സ്വീകരിക്കണമെന്നും താരം ആവശ്യപ്പെട്ടു.
‘ബ്ലഡി ബെഗ്ഗർ’, ‘സത്യ’, ‘സഭാ നായകൻ’ തുടങ്ങിയ ചിത്രങ്ങളിലൂടെ പ്രേക്ഷകർക്ക് പരിചിതമായ നടിയാണ് അക്ഷയ ഹരിഹരൻ.
ഏപ്രിൽ 23-ന് തമിഴ്‌നാട്ടിലെ 234 മണ്ഡലങ്ങളിലും വോട്ടെടുപ്പ് നടന്നപ്പോൾ രജനീകാന്ത്, വിജയ് സേതുപതി, ധനുഷ്, കമൽ ഹാസൻ തുടങ്ങിയ പ്രമുഖ താരങ്ങളും പോളിംഗ് ബൂത്തിലെത്തിയിരുന്നു. സംസ്ഥാനത്ത് ഏകദേശം 84.69 ശതമാനം പോളിംഗാണ് ഇത്തവണ രേഖപ്പെടുത്തിയത്. അതിനിടയിൽ നടന്ന ഇത്തരം സംഭവങ്ങൾ വലിയ ചർച്ചകൾക്കാണ് വഴിതുറന്നിരിക്കുന്നത്.
