സ്റ്റൈലിഷ് സ്റ്റാർ അല്ലു അര്ജ്ജുന്റെ പുഷ്പ 2 പ്രേക്ഷകർ ഏറ്റവും ആകാംക്ഷയോടെ കാത്തിരിക്കുന്ന ചിത്രമാണ്. പുഷ്പ: ദ റൈസ്, എന്ന സിനിമയുടെ ഒന്നാം ഭാഗം വന് വിജയമായിരുന്നു. ഇപ്പോൾ പുഷ്പ 2വിന്റെ ചിത്രീകരണം പുരോഗമിക്കുകയാണ്. ഇപ്പോഴിതാ ചിത്രത്തിന്റെ സംവിധായകൻ സുകുമാറും പുഷ്പ 2 ടീമും അല്ലു അര്ജുന്റെ പിറന്നാള് ദിവസത്തിന് മുന്നോടിയായി ആരാധകർക്കായി ഒരു സര്പ്രൈസുമായി എത്തിയിരിക്കുകയാണ്. പുഷ്പ 2വിന്റെ ഒരു ചെറിയൊരു വീഡിയോ ശകലമാണ് അണിയറപ്രവർത്തകർ പുറത്തുവിട്ടിരിക്കുന്നത്.
വെടിയേറ്റ മുറിവുകളോടെ പുഷ്പ തിരുപ്പതി ജയിലില്നിന്ന് പുറത്തുചാടി എന്ന ന്യൂസ് ഹെഡ് ലൈനോടെയാണ് വീഡിയോ തുടങ്ങുന്നത്. തുടർന്ന് പുഷ്പ എവിടെ? എന്ന ചോദ്യമാണ് കാണിക്കുന്നത്. ഇത് തീർച്ചയായും പ്രേക്ഷകമനസ്സുകളില് കൂടുതല് ആകാംക്ഷ ഉണർത്തിയിട്ടുണ്ട്. അല്ലു അർജുന്റെ പിറന്നാൾ ദിവസമായ ഏപ്രിൽ 7നാണ് പുഷ്പ 2വിന്റെ ടീസർ പുറത്തിറങ്ങുന്നത്. ഇപ്പോൾ ഇറങ്ങിയിരിക്കുന്ന വീഡിയോ ശകലം ആരാധകരുടെ പ്രതീക്ഷയെ ഉയർത്തിയിട്ടുണ്ട്.